Sommarens gjesteutstillar på Dyre Vaa-samlingane er Ingolf Endresen (f. 1971). I fotoutstillinga «Takk, Ivar Aasen» har Endresen fotografert gamle garasjar og uthus i Vest-Telemark.
Ingolf Endresen kom som student til Rauland i 2005 og har sidan budd der. Han er ein vidt omfamnade kunstnar med mastergrad i tradisjonskunst. Han har også drive med sylvarbeid og er flink til å danse! Men det er fotografikunsten som blei hovudvegen for kunstnaren. Han byrja å fotografere i 1988 og tok fyrst fotofag på Lillehammer, seinare deltok han på Morten Krogvolds fotografiakademi i Vågå. Han har studert tradisjonskunst og fotorelaterte fag ved HiT i Rauland og på Notodden.
Ingolf Endresen har fått Telemark fylkeskommunes kunstnarstipend og Statens arbeidsstipend og har deltatt på fleire kollektivutstillingar og separatutstillingar.
I fotoutstillinga «Takk, Ivar Aasen» har Endresen fotografert gamle garasjar/uthus i Vest-Telemark. På Haddland i Rauland blei fleire av desse rive i samband med bygging av gang- og sykkelveg.
«Jeg synes det er trist at disse forsvinner fra landskapet uten at det finnes noen form for dokumentasjon på hvordan ting har sett ut», seier kunstnaren. Desse bygga blei gjerne bygd av det ein hadde av material og utan standariserte mål eller ferdigfabrikkerte delar.
Endresen stiller ut om lag 15 analoge silverprint fotografi produsert i atelieret i Rauland – i til dels store format. Tittelen «Takk Ivar Aasen» kom som eit resultat av at det var tagga på ein av garasjane han fotograferte.
Utstillinga opnar 24. juni kl. 17:00. Velkomen innom!
Den er elles tilgjengeleg i opningstida til Dyre Vaa-samlingane: tysdag til sundag kl. 11:00 til 17:00 i perioden 25. juni til 15. august. I tillegg til dei faste samlingane kan du no oppleve ei oppgradert utstilling om Svallaug Svalastoga på museet.
