Fredag 9. juni kl. 19.00 i Vinjesalen på Raulandsakademiet, del av sommaravslutningshelga på Campus Rauland
SUSANNE LUNDENG
Virtuost felespel, skøyre songar, innovasjon og tradisjon, med den nordnorske folkemusikken som ankarfeste. Slik blir musikken til Susanne Lundeng skildra.
Lundeng er felespelar, songar og komponist. Komposisjonane hennar oppstår i møtet mellom musikalske minne og kjærleiken til drivande nordlandske danserytmar og vemodige folketonar. Arbeidet hennar med innsamling, formidling og vidareutvikling av folkemusikken i meir enn 30 år har gjort ho til ei av Noregs mest meritterte folkemusikarar. I 2016 hausta ho Spellemannpris for utgjevinga «111 Nordlandsslåtter» og i 2019 mottok ho NOPAs tekstpris for sin fyrste songtekst «Det va nære på».
I samspelet med musikar Nils-Olav Johansen oppstår eit leikent og ekspressivt kammerspel; ein symbiose av nordnorsk folkemusikk, improvisasjon og viser. Konsertane til Susanne er gjerne lette, leikne og lystige, men byr samstundes på det stormfulle, rørande, intense og råe.
Susanne Lundeng – fele/song
Nils-Olav Johansen – gitar/vokal
Billettar i døra: 250,-/150,-
Foto: Martin Losvik
