55 interesserte møtte på Raulandsakademiet tysdag 16. september for å høyre om Skinnarlandfamilien og krigsåra 1940 -1945.
Familiane Skinnarland var sentrale i motstandsarbeidet i Rjukan og Møsstrond under krigen, og det var tett kontakt mellom Rjukan, Skinnarbu og folket på Møsstrond. Olav, hotelleigar og kjøpmann, fødd i 1906, var den eldste av Skinnarlandbrørne, Torstein, damvoktaren, var fødd i 1910 og Einar, kanskje den best kjente, som var på viddi det meste av tidi, var fødd i 1918.
Olav og Torstein var båe på Grini, Torstein lengst, i 29 månader. Det var eigentleg Einar som var ettersøkt, men han kom seg unna. Meir enn ti i Skinnarlandfamiliene var på Grini og Ingeleiv har skrive ei sterk og innhaldsrik historie med mykje detaljar om «Hva som hendte vår famile i krigsårene 1940-1945».
Rauland Historielag hadde invitert Inger Britt Skinnarland Bakke, dotter av Ingleiv og Olav Skinnarland og Arnstein Skinnarland, soneson av Torstein Skinnarland, til å fortelje om opplevingane familien hadde under krigsåra. Samtala vart leia av Herdis Lien.
